Ginkompirmar sang coordinator sang Department of Health Region 6 nga 75 porsyento na nga cleared ang Western Visayas sa tipdas.
Sa interview sang Bombo Radyo kay Dr. Mary Jane Juanico, ginpahayag sini nga dako ang gin-improve sang kampanya batok sa tipdas sang tinalikdan nga tuig.
Suno kay Juanico, sa consolated data halin Enero 2019 tubtob Disyembre 25, 2019, may yara sang narekord nga 2,329 cases sang tipdas sa Western Visayas.
Suno sa iya, 816 diri ang halin sa Negros Occidental kag 221 ang halin sa ciudad sang Bacolod.
Ginpahayag man sini nga may yara sang 14 ka mga kaso sang measles associated deaths sa rehiyon kag lima diri ang halin sa Negros Occidental.
Apang suno sa coordinator, isa ukon duha nalang ang kaso sa tinalikdan nga duha ka semana sa Western Visayas.
Suno sa iya, wala na sang reported cases sa Guimaras samtang isa nalang ka municipality ang may narekord nga kaso sang tipdas sa Aklan kag isa man sa Antique.
11 naman sa 17 ka mga munisipalidad sa Capiz ang wala na sang kaso; 27 sa 43 nga munisipalidad sa Iloilo; kag 23 sa 31 ka mga munisipalidad sa Negros Occidental.
Ginkompirmar man sini nga 35% na sang mga kabataan sa rehiyon ang nagpakigbahin sa immunization program.
Sa karun suno kay Juanico, ginahulat pa ang final report sang mga barangay.
Nagpanugyan man ini sa mga pumuluyo nga magmintinar sang matinlo nga hygiene kag padayon nga magsuporta sa ila mga programa tuhoy sa immunization.
