Target na lamang sang Western Visayas delegation nga makuha ang ikaduha nga pwesto sa Palarong Pambansa 2025.
Sa interview sang Bombo Radyo Bacolod kay Negros Occidental Provincial Sports Coordinator Romeo Sison, tuman na ka layo ang gold medals nga nakuha sang National Capital Region, apang may tyansa pa nga makalagas ang Region 6 sa Region 4A.
Nagasalig si Sison nga sa maayo nga hampang sang mga atleta, madamo pa sang makuha nga gold kag sila ang makalagas pa.
Gindumdum sini nga sang Palarong Pambansa 2024 sila ang nagapangaduha man, apang nalagas sang Region 4A nga naka-abanse lamang sang isa ka gold.
Nagalaom si Sison nga makahakot pa sang madamo nga gold medals ang Western Visayas antes magtakop ang hinampang partikular na sa boxing, tennis, table tennis, wushu, archery, gymnastics, athletics kag mga team sports.
Dako naman ang bulig sa pagpahanugot nga makapili sang atleta sa mga team sports gikan sa iban nga mga team sang Western Visayas.
Aminado man ini nga nagbaskog ang performance sa athletics sang iban nga rehiyon, bangod nakaligad nga tuig halos kalabanan nga hampang sa athletics ang nakuha sa Region 6.
Isa man sa ginabantayan ang Bacolod Tay Tung High School nga masulod na sa semifinals bwas matapos magdaog batok sa Region 10 kaina sang aga.
Ginpadayaw naman ni Sison nga duha ang nabreak nga record ni Mico sa 100 meter hurdles 400 meter hurdles Secondary Boys.
Mismo si Negros Occidental Governor Eugenio Jose “Bong” Lacson ang nagpalab-ot man sang pagdayaw kay Mico kag kay Coach Miguel Arca.
Nagapasalig ang Provincial government nga suportahan nila ang pag-eskwela kag mga hampang ni Mico.
