Gintay-og sang magnitude 4.8 nga linog ang probinsya sang Iloilo kag nabatyagan man ini sa pila ka bahin sang Capiz kag Negros Occidental kagab-i.
Suno sa PHIVOLCS, ang linog ang Tectonic in origin kag ang epicenter ang nagluntad sa banwa sang San Enrique, Iloilo.
Nakabatyag sang Intensity 2 ang President Roxas, Capiz; intensity 3 sa Iloilo City, Bacolod City kag La Carlota City sa probinsya sang Negros Occidental.
Samtang intensity 4 naman sa Tapaz, Capiz, Passi City kag Dingle sa Iloilo.
Wala naman sang may ginapaabot nga aftershocks sa nagluntad nga linog.
Sa interview sang Bombo Radyo Bacolod kay Provincial Disaster Management Program Division head Dr. Zephard Gerhart Caelian, wala sang may nareport nga ano man nga nahalitan sang linog sa probinsya.
Gina-abisuhan sini ang publiko nga indi gid mag-panic sa tion sang emerhensya agud makapanumdum sang husto nga himuon.
Dugang pa ni Caelian, indi gid dapat pagkalimtan ang duck, cover and hold sa tion sang linog.
Mas maayo pa gid suno sa PDMPD head nga preparado ang tanan sa tion sang emerhensya kag nakahibalo sang evacuation site.
