Nalab-ot sang Region 6 ukon Western Visayas ang ika-tatlo nga pwesto sa pagtakop sang mga pahampang sa Palarong Pambansa 2025.
Nahibaluan nga kahapon, Mayo 30 natapos ang program proper, kag subong nga adlaw, Mayo 31 ang closing ceremony sang pahampang, nga ginsuguran sang Mayo 26.
Ang Western Visayas ang nakahakot sang 44 ka gold medal, 52 ka silver medal kag 54 ka bronze medal.
Napabilin sa una nga pwesto ang National Capital Region (NCR) nga may tuman ka dako nga abanse sa medal tally, matapos makakuha sang 114 ka gold, 69 silver kag 49 bronze; nagapangaduha ang Region 4A ukon CALABARZON nga may 46 gold, 67 silver kag 65 bronze; kasunod sang Region 6, yara naman sa ikaapat nga pwesto ang Region 11 ukon Davao Region nga may 41 gold, 27 silver kag 36 bronze.
Ikalima naman sa rankings ang Region 10 ukon Northern Mindanao nga may 31 gold, 25 silver kag 45 bronze; Region 3 ukon Central Luzon ang pang-anom nga may 29 gold, 25 silver kag 34 bronze; nagasunod naman diri ang Region 7 ukon Central Visayas; Region 13 ukon Caraga; Cordillera Administrative Region (CAR) kag ang ika-napulo amo ang Region 8 ukon Eastern Visayas.
Nagtapos man ka hapon sa silver medal ang kampanya sang Bacolod Tay Tung High School matapos malutos sa finals sang Volleyball Secondary girls batok sa NCR.
