Opisyal na nga nagtakop ang Western Visayas Regional Athletic Association (WVRAA) Meet 2023 sa probinsya sang Aklan subong nga hapon.
Kadungan sa iya nga kaadlawan subong nga adlaw, ginpasalamatan naman ni Department of Education (DepEd) Regional Office 6 Director Dr. Ramir Uytingco, ang probinsya sang Aklan sa paghost sang aktibidad kasubong man ang tanan nga partisipante.
Ginkilala man sini ang suporta sang mga provincial governors gikan sa Iloilo, Negros Occidental, Aklan, Capiz kag Antique.
Nagtakop ang WVRAA Meet 2023 sa pagchampion sang Iloilo delegation nga nakakuha sang 172 nga gold, 119 nga silver kag 83 ka bronze sa Elementary kag Secondary categories.
Samtang 1st runner-up naman ang Negros Occidental nga nakaangkon sang 147 nga gold, 137 nga silver kag 109 ka bronze medals.
Nangin second runner up naman ang Aklan nga ginsundan sang Capiz, Antique kag Guimaras.
Sa interview kay WVRAA Bombo Correspondent Antonio Oquindo, nagchampion ang volleyball elementary girls sang Negros Occidental kaina sang aga batok sa Iloilo sa score nga 2-0.
Ginakasubo naman sini nga kaangay nga wala lamang sang labot ang mga pumuluyo sa banwa sang Makato, Aklan kag ang mga nagalantaw lamang sa pahampang amo ang mga pangayaw nagikan pa sa Iloilo kasubong man ang mga nagasuporta sa players sang Negros Occidental.
Isa man sa ginakasubo sini ang ginbuhat nga pagpamato sang mga kabataan sa banwa sang Banga sa ginatiniran sang mga players.
