Nagtakop na ang Western Visayas Regional Athletics Association (WVRAA) Meet 2024 kahapon sang hapon Mayo 7.
Ginpatigayon ang closing ceremony sang nasambit nga pahampang sa Panaad Park and Stadium sa ciudad sang Bacolod.
Antes pa man ang awarding, ginpatigayon ang parade of champions.
Nagchampion ang Iloilo sa Elementary kag Secondary level samtang 1st runner-up ang Negros Occidental kag 2nd Runner-up naman ang probinsya sang Aklan.
Santo sa final medal tally sa elementary level, ang Iloilo ang nakakuha sang kabug-usan nga 72 gold; 51 silver kag 38 bronze samtang sa Secondary level nakakuha ang mga ini sang kabug-usan nga 103 gold; 76 silver; kag 64 nga bronze.
Ang Negros Occidental nga first runner up, sa Elementary level nakakuha ang mga ini sang kabug-usan nga 64 gold; 64 silver kag 49 bronze samtang sa Secondary level naman nakakuha sang 88 gold; 86 silver kag 73 bronze.
Samtang ang Aklan ang 2nd runner up, sa Elementary level nakakuha sang kabug-usan nga 12 gold; 10 silver kag 42 bronze.
Ginpatigayon man ang turn-over sang masunod nga magahost sang Western Visayas Regional Athletics Association (WVRAA) Meet kag ini ang probinsya sang Antique para sa 2025 nga ginpangunahan ni Negros Occidental Governor Eugenio Jose “Bong” Lacson.
Naghatag man sang closing speech si Bacolod City Councilor Al Victor Espino bilang representative ni Bacolod City Mayor Alfredo “Albee” Benitez.
Sa mensahe ni Espino, ang sports ang nagatudlo sang disiplina sa kaugalingon sang players bangud kinahanglan ini agud nga makaperform.
Suno sa konsehal, kinahanglan man ang disiplina agud nga mahimo sang mga ini ang dapat nila nga himuon.
