Ginakalipay sang Department of Health nga wala sang narecord nga polio cases sa bilog nga Western Visayas subong nga tuig.
Suno kay Dr. Renilyn Reyes, pinuno sang Public Health Development Program sang Department of Health (DOH) Region 6, may igapatigayon nga Supplemental Vaccination Nationwide para sa Measles, Rubella kag Polio.
Pasalig naman ni Reyes nga nagapadayun nga ginamonitor sang DOH ang mga senyales sang polio sa rehiyon kaangay sang kaso nga ginatawag “Acute Flacide Paralysis (AFP)”.
Ini ang mga hitabo kun sa diin ang mga naga-edad sang 14 anyos panubo ang gulpyada nalang nga nagapangluya.
Madumduman nga may duha ka kumpirmado nga polio cases ang narecord sadtong 2019 nga ginalakipan sang tatlo ka tuig nga babayi sa Lanao kag lima ka tuig nga lalaki sa Laguna.
Nahibaluan nga apat ka doses sang vaccine ang ginahatag sa mga kabataan nga sadto gina-inject apang sa karun may ara naman sang oral polio vaccine nga ginapainum nalang sa mga kabataan.
Ang polio ang sarang mangin tunaan sang kamatayon sa tion nga maglala.
Isa ini ka impeksyon nga tuga sang virus nga sarang magtuga sang permanente nga pagkaparalisa.
Wala naman ini sang bulong apang sarang nga ma-prebentar paagi sa pagpabakuna.
Panugyan sa mga ginikanan nga pabakunahan ang mga kabataan.
