Aminado ang witness sa shooting incident sa Libertad Public Market kaina sang kaagahon nga ginakahangaw-an gid man nila ang biktima bangod ini ang masami nga nagamaoy.
Ang biktima ang nakilala pa lamang sa pangalan nga Alyas Alog, kargador sa merkado ang nagakatulog sa folding bed kapin alas-3:30 kaina sang kaagahon sang ini ang hinali nga ginluthang sang nakahelmet nga suspect.
Tubtob sa karun wala pa natumod ang matuod nga identity ni Alog, kag wala paman sang pamilya nga nagclaim bangkay.
Sa interview sang Bombo Radyo Bacolod kay Alyas Boyboy, wala sini makita ang una nga pagpangluthang, apang nabatian nila sang mag-agay si Alog.
Naglahog pa ang ila mga kaupdanan nga “wala man gali maagi kay nag-agay pa” sa pagpinsar nga ini ang nagalahog lamang.
Apang gintsekyar ni Boyboy ang biktima kag didto sini nakita nga matuod nga may-igo sang bala, gani nagsinggit ini nga matuod ang pagpaniro, rasun nga naghapa man ang tanan nga yara sa merkado sang amo nga tion.
Suno kay Boyboy, sa una nga pagluthang, nagderetso pa ang gunman, apang sang mabatian sini nga nag-agay si Alog, ginbalikan niya ini kag liwat nga gintiro.
Ang suspect ang nakasuksok sang itom nga full faced helmet apang wala sang visor, may puti nga facemask, nakakhaki shorts kag itom nga long sleeves.
Sa paglantaw sini, cal. 38 revolver ang armas sang suspect, nga may improvised silencer.
Aminado si Boyboy nga masami nagamaoy ang suspect partikular na kun gab-i.
Ini ang masami man nagapanghaboy sang botelya kag may ginlagas naman sadto dala ang kutsilyo.
Ini man ang rasun kun ngaa gina-updan ni Boyboy ang iya iloy nga nagabaligya sa merkado, kag ginakahangaw-an man sini ang biktima bangod may duha pa ka tigulang sa pwesto nga mahimo sini masakit.
Ginkuha naman ini sadto sang kapulisan sang magmaoy, apang nakagwa man kag nagbalik sa merkado bangod wala man sang may nagapasaka sang kaso.
Suno kay Boyboy, kun kaisa kaangay nga may deperensya sa paminsaron si Alog apang may tion man nga ma-estorya sang tadlong.
Dako man ang posibilidad nga ini ang nagauyop bangod masami ini nga kaupod sang mga kilala na nga adik sa lugar.
