Ginbasura sang Regional Trial Court Branch 79 ang Writ of Habeas Corpus nga ginfile sang naaresto nga transport leader batok sa duha ka opisyal sang Bacolod City Police Office (BCPO) kasunod sang nangin magamo nga rally-protesta sang Miyerkules.
Sa interview sang Bombo Radyo Bacolod kay Police Lt. Col. Joery Puerto, pinuno sang Bacolod City Investigation and Detective Management Unit, matapos ang pag-aresto sa mga lideres kag miyembro sang Bacolod Alliance for Commuters, Operators and Drivers Incorporated (BACOD), Kabakod Negros Transport Coalition Incorporated (KNETCO) kag United Negros Drivers and Operators Center (UNDOC), si BACOD President Rudy Catedral ang nagfile man sang Writ of Habeas Corpus.
Ang Writ of Habeas Corpus, ang isa ka court order nga maga-imbestigar sa rasun ukon grounds sang detention ukon pag-aresto.
Ang subject sa request amo sanday Puerto kag si Police Major Eugene Tolentino, station commander sang Bacolod Police Station 2.
Suno kay Puerto, tuyo sang transport leader nga pamatud-an nga unlawful ang pag-aresto sa ila.
Madumduman nga anom ang naaresto kalakip na si Catedral kun sa diin lima sa ila ang ginkasuhan bangod sa disobedience to authority, illegal act of assembly kag bayolasyon sa no permit no rally policy kag nagpyansa sang P3,510 kada isa.
Ang isa ang ginpasakaan naman sang kaso nga direct assault bangod sa pagpanapungol sang pulis, kag nakapyansa sang P36,000 kagab-i.
Panindugan ni Puerto nga ang pagbatun sa kaso nga ginfile sa mga transport leader kag members ang pamatuod nga may nagakaigo nga basihan sa ila nga pag-aresto.
