Dalayon na nga nagnubo ang world ranking sang Filipina tennis player nga si Alex Eala matapos ang iya nga Round of 16 exit sa Miami Open 2026.
Napaslawan ang Filipina star nga maliwat ukon malapawan ang semifinals appearance sadtong 2025, gani nadula ang anay puntos nga magadugang kuntani sa iya ranking.
Nagdangat sa 270 points ang nadula sa Pinay tennis star.
Santo sa opisyal nga singles ranking sang Women’s Tennis Association (WTA) sang Marso 30, nauyatan ni Eala ang rank No. 45.
Mas manubo ini sang 16 nga pwesto nagikan sa career-high No. 29 nga nalab-ot sini duha na kasemana ang nakaligad.
Ginakabig ini nga pinakadako nga pagnubo sa WTA rankings subong nga semana.
Liwat naman nga magahampang si Eala sa mga masunod nga kumpetisyon sa Clay Season nga magaumpisa sa Abril kun sa diin ginalauman nga mabawi kag liwat nga magasaka ang world ranking sini.
