Nagtakop na subong nga hapon ang 2025 Western Visayas Regional Athletics Association Meet (WVRAA 2025).
Sa interview sang Bombo Radyo Bacolod kay Hernani Escullar Jr., public information officer sang Department of Education Region 6, ang Iloilo kag Negros Occidental gid lamang ang naga-agaway sa overall championships humalin pa sang mga tinalikdan nga kompetisyon.
Ang WVRAA 2025 ang opisyal nga nagtakop alas-3:00 subong nga hapon, kun sa diin may awardings sang category champions kag overall champions kasubong man mga awards para sa delegations.
Ginpatigayon naman ang pagpanaog sang colors kag banners kag gin-anunsyar naman ang masunod nga host sa WVRAA 2026.
Pahanundom sini nga humalin sang umpisa, ginasulit-sulit na sa mga atleta nga apisar sa mainit nga kompetiston, pagkatapos sang events, sila ang mag-abyan na.
Ini ang nakita man sang DepEd official sa mga humalampang.
Ginpasalamatan man sini nga natapos ang aktibidad nga wala sang major incidents kag ginpasalamatan man sini ang maayo nga preparasyon sang Antique.
Ang mga nagdaog ang ipaidalom pa sa qualifying sang Regional Screening and Accredition Committee.
Paathag ni Escullar nga indi kaangay sang 2023 nga may ginpatigayon pa nga qualifying match, karun tanan nga nagdaog ang mahimo na nga makahampang sa Palarong Pambansa basta makapasar sa qualifying standards.
Sa pagbanta sini, yara sa 500 tubtob 600 ang mga atleta gikan sa Western Visayas nga magacompete sa national competition.
