Ang mga team sports nga magachampion sa Western Visayas Regional Athletics Association (WVRAA) Meet 2024, ang automatic na nga magapartisipar sa Palarong Pambansa 2024; apang magakinahanglan naman nga makapasar sa qualifier ang mga gold medalist sa single ukon individual sports.
Sa interview sang Bombo Radyo Bacolod kay Hernani Escullar Jr. public information officer sa Department of Education (DepEd) Region 6, alas-3:30 kaina sang hapon, nag-umpisa ang parade of champions kag kapin alas 4:00 ang takna hapon, ginpatigayon ang closing ceremony.
Ginpasalamatan sini ang paghost sang Negros Occidental kasubong man ang co-host nga Bacolod City.
Suno kay Escullar, ginakalipay sini nga maayo ang nangin akomodasyon kag wala gid sang may narecord nga major complaints.
Paathag sini nga ang WVRAA ang nagasunod sa Olympic medal tally system kun sa diin ang kadamuon sang gold medals ang ginabasehan sa overall champion, samtang kun magtie naman, didto na basihan ang silver ukon bronze medal.
Sa kabug-usan may-ara sang 44 ka sporting events nga ginalakipan sang 16 sa elementary category, 23 sa secondary, apat sa para games kag isa sa demo sports.
Nagdangat naman sa 1,682 ka mga medalya ang ginhatag para sa secondary kag 1,054 ang sa elementary category.
Istrikto naman ang game committee sa ila nga pagpagwa sang mga game results kag bangod wala na sang selection, kun sin-o sa mga team sports ang nagchampion sila naman ang magacompete sa Palarong Pambansa.
Samtang indi kaangay sang 2023 Palarong Pambansa, kun sa diin nagpatigayon sang clustering kag naghampang ang mga team sports sa Cebu, sa tunga sang Region 6, 7 kag 8 kag ang top 2 amo lamang ang nagcompete sa Palarong Pambansa, subong ang mga nagdaog ang derekta na nga magahampang sa National level.
Sa pihak nga bahin ang mga individual sports naman ang magakinahanglan pa nga maglabay sa qualifying.
Suno kay Escullar, nakaligad nga tuig, tatlo ka individual sporting events lamang ang wala sang partisipante ang Western Visayas bangod sa wala nakapasar sa qualification.
Paathag sini nga naga-isa sa karun ang Western Visayas sa pag-atubang sa Palarong Pambansa kag wala pa ginapinsar ang posibilidad sang pagsipak sang Negros Occidental sa masunod nga tuig sa tion nga mapasar ang Negros Island Region (NIR).
