Pormal na nga ginbuksan ang Western Visayas Regional Athletics Association (WVRAA) Meet 2024 kahapon sang hapon.
Ini ang gintambungan sang madamo nga tao, mga supporters sang mga atleta gikan sa nagkalain-lain nga bahin sang probinsya nga Western Visayas.
Ginpangunahan ni Department of Education Regional Office 6 Regional Director Dr. Ramir B. Uytico ang pagbukas sang Western Visayas Regional Athletics Association (WVRAA) Meet 2024 nga ginpatigayon sa Panaad Park and Stadium diri sa ciudad sang Bacolod.
Naghatag man sang welcome mesage sanday Bacolod City Mayor Alfredo “Albee” Benitez kag Negros Occidental Governor Eugenio Jose “Bong” Lacson.
Nagtambong man sa opening ceremony sang WVRAA Meet 2024 sanday Aklan Governor Jose Enrique Miraflores; Antique Governor Rhodora Cadiao; nagbisita man si Capiz Governor Fredenil Castro; Iloilo Governor Arthur Defensor Jr., kag Guimaras Governor Joaquin Carlos Rahman Nava.
Nangin keynote speaker naman si Dr. Bryan Poe Llamanzares, ang Chief of Staff sa opisina ni Senator Grace Poe.
Si Llamanzares ang anak man ni Senator Grace Poe.
Samtang ang mga delegasyon nagikan sa mga probinsya sa Western Visayas kun sa diin kaupod na ang mga coaches assistant coaches sa probinsya sang Aklan ang ginabug-usan sang 847 delegates; Antique 871; Capiz 973; Guimaras 561; Iloilo nga may 837 kag Negros Occidental nga may yara sang 903 delegates.
Gin-anunsyar naman sang Department of Education Westen Visayas nga kanselado ang mga outdoor games halin sa alas -9:00 ang takna sa aga tubtob alas 3:00 ang takna sa hapon bangud sa sobra nga init sang panahon apang magapadayon naman ang mga indoor games.
