Ginkumpirmar ni Atty Norman Golez nga nagpaggwa sang panibag-o nga warrant of arrest batok sa Yanson 4 angot sa kaso nga Qualified Theft may kaangtanan sa P803.47 million sa corporate funds.
Suno kay Atty Golez, ang Mindanao Star Bus Transport, Inc. (MSBTI) nga ginpamunuan ni Leo Rey V. Yanson, ang nagpasaka sang mga criminal cases sa Pasig City kag Bacolod City batok kanday Roy V. Yanson, Emily V. Yanson, Ma. Lourdes Celina Y. Lopez, kag Ricardo V. Yanson Jr., nga gintawag nga Yanson 4, matapos matukiban ang masobra P803.47 milyon nga pondo sang MSBTI nga gina-alegar gin-withdraw gikan sa mga Philippine National Bank (PNB) account sini kag gindeposit sa ila mga personal bank accounts sang 2019.
Ginpaathag sini nga ang mga tseke ang gindeposit sa Bacolod kag Pasig apang santo sa report wala sa pungsod ang Yanson 4 kag indi man sila ma-contact.
Ginpahayag man ni Gomez nga indi maserbe ang mga warrant of arrest kun indi maaresto ukon magsungka ang apat.
Dugang pa, temporaryo nga i-archive sang mga Regional Trial Court ang mga kaso samtang wala pa sila nag-atubang sa korte.
Sang Pebrero 2020, gin-freeze sang PNB ang mga bank accounts sang MSBTI nga nangin rason sang isa ka interpleader case sa Regional Trial Court sang Bacolod City.
Apang sang Hulyo 14, 2025, matapos ginkilala sang korte ang grupo ni Leo Rey Yanson bilang lehitimo nga Board of Directors sang MSBTI, ginpahanugutan na sang PNB ang iya nga grupo nga ma-access ang mga account sang kumpanya.
Bukas ang Bombo Radyo Bacolod sa pagbatun sang sabat sang Yanson 4 angot sa kaso.
