Gilayon nga gin-airlift sa Manila ang matriarch sang Yanson group of bus companies nga si Olivia Villaflores Yanson matapos matapikan sang coronavirus.
Suno sa iya bata nga si Ginnette Dumancas kahapon, nagpositibo sa virus ang 86-anyos nga si OVY.
Suno naman kanday Roy, Ricardo Jr., Emily, kag Celina Yanson-Lopez ukon ang “Yanson 4″, gindala sa ospital sa Bacolod ang ila iloy sang Sabado kag gin-airlift ini sa Manila bangud nabudlayan nga magginhawa.
Sa karon, ginabulong na si OVY sa St. Luke’s Medical Center.
Nag-apelar naman si Dumancas sa publiko nga pangamuyon ang madasig nga recovery ni Yanson.
Sa ginpagwa nga press statement sang Yanson 4, wala sila sang direct contact sa ila iloy apang padayon nga nagapangamuyo sang iya nga pag-ayo.
Madumduman nga may nagluntad nga legal battle sa tunga sang apat kag sang ila iloy kaupod sanday Ginnette kag Leo Rey, tuhoy sa pagkontrolar sang Vallacar Transit Inc.
Suno sa apat ka mag-utod, nakahanda sila nga ipahigad ang legal battle sa ila iloy bangud ang iya ikaayong-lawas ang ila main concern.
