Nagbiya na bilang pinuno sang Chinese Basketball Association (CBA) ang NBA legend nga si Yao Ming matapos ang pito ka tuig sini sa serbisyo bangod sa indi maayo nga performance sang national team.
Ang Basketball ang kilala nga game sa China kag ang former Rockets center ang pinakakilala nga player sa pungsod kun sa diin popular sa gihapon si Yao Ming bisan pa nga nagretiro na ini sa paghampang sang tuig 2011.
Suno kay Yao Ming, manaog na ini sa position bilang head sang CBA bangod ang performance kag result sang team ang wala nakalab-ot sa iya nga expectations.
Nangin hugot ang pagcritique sang 44 anyos nga player kun sa diin ginhambalan sini nga tamaran ang mga players kag nagwarning pa ini nga may dako nga gap sa tunga sang national team kag sa mga best nga team sa bug-os nga kalibutan.
Suno diri, ginabaton sini ang responsibilidad matapos nga wala naqualify ang team sa 2024 Paris Olympics.
Ginkumpirmar naman sang CBA ang resignation ni Yao Ming nga may yara pa kun tani sang duha ka tuig nga nabilin sa termino sini.
Sa mahibaluan, si Yao Ming ang tumandok sang Shanghai, kag may kataason nga 2.29 meters ukon 7.5 feet.
Siya ang nangin kabahin sang team sang Houston Rockets sang 2002 kun sa diin nangin kilala ini sa iya nga performance sa paghampang kag nangin Basketball Hall of Famer.
Apang nauntat ang playing career sini bangod sa mga injuries kag nagretiro sa edad nga 30 anyos.
