Ginpahayag ni Bayan Muna Executive Vice President Atty Carlos Isagani Zarate nga nahadlok ang administrasyon subong ni Marcos nga mag-atubang sa mga nagaprotesta.
Ini bangud suno sa iya, kun matuod nga nagaserbisyo si President Ferdinand Marcos Jr. sa katawhan, indi kuntani siya magpatuman sang lockdown sa pila ka mga dalanon ilabi na sa palibot sang Malacañang Complex kadungan sa pagdumdum sang ika-54 nga anibersaryo sang Martial Law Declaration sang iya amay subong nga Setyembre 21.
Sa baylo suno kay Atty Zarate, atubangon sini ang mga tawo nga nagasinggitan sang mga problema nga ila ginaatubang sa subong kaangay sang padayon nga pagtaas sang presyo sang balaklon kag gatong, manubo nga sweldo, kurapsyon kasubong man ang paglapas sa mga kinamatarong sang mga Pilipino.
Sa kaangot nga balita, ginpanindugan ni Bayan Muna Executive Vice President Atty Carlos Isagani Zarate nga tubtob subong, nagapabilin sa gihapon ang epekto sang Martial law makaligad ang 54 ka tuig humalin sang gindeklarar ini sa idalom sang administrasyon ni late President Ferdinand Marcos Sr.
Sa interview sang Bombo Radyo kay Atty Zarate, ginpahayag sini nga masakit ang kamatuoran nga padayon sa gihapon nga nagakabatayagan sang pungsod kag Pilipino ang mga epekto sang mga nagakatabo sang Marcos dictatorship sadto.
Kalakip na diri ang pagkalubog sa utang sang pungsod kag mga biktima sang martial law nga suno sa iya, wala nahatagan sang hustisya, kurapsyon, pagbutang sang mga ‘cronies’ kag pagsulod sa gobyerno para sa kaugalingon nga interest.
Suno sa Abogado, indi kinahanglan ang pagdeklarar sang Martial Law agud mangin maauyu ang isa ka gobyerno.
Bangud suno diri, pila sa mga neighboring countries sang Pilipinas ang nagsanyog ang ekonomiya nga wala nagdeklarar sini kaangay sang Vietnam kag Japan.
Samtang suno kay Atty Zarate, hasta subong ang Pilipinas ang nabilin sa tabtaban.
Para kay Atty Zarate, indi disiplina ang gintanom sang Martial Law kundi kahadlok lamang sa mga tawo.
