Patay ang isa ka zumba instructor matapos gintiro sa gwa sang isa ka hypermart sa Burgos St., Barangay 4, Hinigaran, Negros Occidental pasado alas-8:00 kaina sang aga.
Suno kay Police Lt. Col. Necerato Sabando, hepe sang Hinigaran Municipal Police Station, ginkilala ang biktima kay Clint James Tomasar, 34-anyos kag residente sang Narauis, Hinigaran.
Santo sa imbestigasyon, padulong ang biktima sa balaligyaan sang cellphone sa Prince Hypermart sang hinali lang gintiro sang lalaki nga nagasuksok sang stripes sang T-shirt, shorts kag nagasuksok man sang baseball cap.
Bangud sa ulo naigo ang biktima, gilayon ini nga ginbawian sang kabuhi.
Matapos ang krimen, nagsakay ang suspetsado sa motorsiklo kag nagpalagyo.
Base sa initial nga investigation, ginsundan sang suspetsado ang biktima kag didto na gintiro.
Padayon pa ang imbestigasyon agud matumod ang motibo sa krimen bangud wala man sang previous criminal record ang zumba instructor.
