BACOLOD CITY – Kadungan sang pagtay-og nga nabatyagan sa halos bug-os nga Kabisay-an kahapon sang hapon, ginlaslasan man sang buhawi ang duha ka mga barangay sang ciudad sang Himamaylan.
17 ka mga puluy-an, lakip na ang isa ka eskwelahan, ang ginhalitan sang buhawi nga naglabay sa Barangay Nabalian kag Barangay Kabanbanan, ciudad sang Himamaylan.
Sa exclusive interview sang Bombo Radyo, ginpahayag ni Himamaylan City Mayor Agustin Ernesto “Tinto” Bascon nga isa ka puluy-an ang totally-damaged kun sa diin ginhul-ab sang mabaskog nga hangin ang atop sang puluy-an nga human sa light materials ukon kahoy.
Sa pihak nga ginguba sang buhawi ang ila mga puluy-an, wala naman sang nagbakwit kag wala man sang nasamaran bangud sang amo nga insidente.
Suno sa alkalde, gilayon nagpadulong ang Department of Social Welfare and Development (DSWD) officer sa apektado nga mga lugar agud magpanagtag sang food packs sa mga nahalitan.
Nagapatigayon naman sang assessment ang natungdan nga ahensiya sang gobyerno para sa nagakaigo nga bulig nga igatan-ay sa mga apektado sang buhawi.
Samtang, wala naman sang scientific explanation kun may koneksyon ang dungan nga pagluntad sang linog kag buhawi.
