Umpisa sa Huwebes Santo, ipaidalom na sa Red Alert Status ang Bacolod City Disaster Risk Reduction and Management Office.
Nahibaluan nga tubtob bwas, yara pa lamang sa Blue Alert Status ang CDRRMO.
Sa interview sang Bombo Radyo Bacolod kay Bacolod CDRRMO Head Dr Ma. Laarni Pornan, ipaidalom na sa Red Alert Status ang departamento sumugod sa Abril 2 tubtob 5.
Indi kaangay sang nakaligad nga tuig kun sa diin sila ang nagfocus sa mga beach kag inland resorts, subong nga tuig, sila ang magapahamtang naman sang mga personnel sa simbahan kag mga dalanon kun sa diin magalabay ang mga prosesyon.
Madumduman nga isa sa nangin trahedya nakaligad nga Biyernes Santo amo ang pag-arado sang mga hubog nga Indian nationals sa mga nagaprosesyon sa Brgy Alangilan nga nagresulta sa tatlo nga ginbawian sang kabuhi.
Suno kay Pornan, ginpadal-an na sini sang sulat ang mga responders sa kada Barangay para sa augmentation.
Samtang magabilin man sila sang tawo sa ila opisina agud may-ara sang makabatun inkaso may magdangop kag mangayo sang bulig.
Magasapol paman ang mga ini sa mga nagapanag-iya sang mga resorts, kag seguruhon nga may mga lifeguards kag safety equipments.
Apang pahanumdom ni Pornan nga indi magsalig ang mga ginikanan kun may lifeguards, kag dapat nga bantayan gid ang mga kabataan, bangod ang mga lifeguards ang madamo sang ginabantayan.
Kun indi naman kinahanglan nga maggwa, panugyan ni Pornan nga magtinir nalang sa balay.
Samtang kun maglagaw, ginapahanumdom man nga likawan ang pagdrive nga naka-inom sang makahulubog nga ilimnon, samtang seguraduhon man nga yara sa maayo nga kondisyon ang salakyan antes magbyahe.
