Patay ang 10 anyos nga babayi nga ginhimuslan sang 33 anyos nga lalaki sa Guihulngan City, Negros Oriental, kahapon alas- 8:30 sang aga.
Sa interview sang Bombo Radyo kay Police Captain Wilma Silva, chief sang Regional Women and Children Protection Desk sang Police Regional Office – Negros Island Region (PRO-NIR), nagalakat ang bata kaupod ang iya lola papanaog sa bukid para kun tani pasakyon ini sa habal-habal padulong sa eskwelahan.
Samtang nagalakat, ang bata nagasunod sa likod sang iya lola kag sa pagbalikid sang lola wala na ang iya apo.
Amo man nga nag-abot ang tiya sang bata kag didto na nila nakit-an nga may lalaki nga kaangay nga may ginaguyod apang wala man nila ini ginsapak bangod malayo ang lalaki sa ila kag indi maayo klaro ang ila nakita kun ano man ang ginaguyod sini.
Nagbalik ang tiya kag lola sa balay sa pagpati nga basi nabilin ang bata sa babaw, apang pag-abot didto naka-lock ang balay kag wala didto ang bata.
Ginpatihan sang tiya nga posible may kaangtanan ang lalaki sa pagkadula sang iya hinablos.
Nagsulod ang tiya sa kampo kag ginpangita ang lalaki apang ang nakita sini mga gamit kag uniform sang iya hinablos kag amo na nga nasapwan ang bangkay.
Suno kay Silva, nadakpan ang suspek sa hot pusruit operation kag gin-ako sini nga ginlamposan niya sang dos por dos nga kahoy ang guya sang bata nga nagresulta sa pagkalipong sini.
Didto na ginhimuslan sang lalaki ang bata apang sang nakita sini nga buhi pa ang biktima, iya ini ginbuno sa dughan sang duha ka beses.
Suno kay Silva, naghambal man ang pamilya nga kilala nga manyakis ang suspek sa lugar kag nanotisyaran na nila nga may pagnanasa ini sa bata.
Sa karun nakahunong na ang suspek nga magapangatubang sang nagakaigo nga mga kaso.
