BACOLOD CITY-Nagpanginwala ang mag-utod nga Durom nga sila ang nagpatay sa 10-anyos nga si Marchel Sayo.
Ang 20-anyos nga si Almar John Durom kag 17-anyos niya nga manghod ang gindakop sang mga kapulisan matapos masapwan nga patay ang Grade 3 student nga si Sayo sa balay nga ila ginatiniran.
Sa interview sang Bombo Radyo kay alyas JJ, ginpahayag sini nga temprano pa siya nagbiya sa balay bangud nagpauli ini sa ila gid puluy-an sa Barangay Zone 10.
Ginbilin niya ang liyabe sang balay sa iya magulang nga si Almar John kag wala na siya nakahibalo kun ano ang masunod nga natabo.
Suno sa iya, nakibot na lamang ini nga ginpatawag siya sang punong barangay kag gindala sa police station.
Suno naman sa magulang nga si Almar John, ginbilin niya ang liyabe sa iya abyan nga si Jayson bangud nagkadto ini sa balay sang iya kahagugma.
Ginpanugyanan niya si Jayson nga ihapit lang sa iya ang liyabe apang sang nadugayan, ginbalikan niya ang balay.
Nakibot na lamang ini nga madamo na sang tawo kag ginlagas siya sang mga residente kag gindakop.// Nagpanawagan pa ini kay Jayson nga akuon ang krimen bangud wala sila sang sala nga mag-utod sa kamatayon sang bata.
Sa dalayon nga interview sang Bombo Radyo sa magulang nga Durom, indi consistent ang mga pahayag sini.
Una niya ginpahayag nga ini ang labing una nga pagkadto ni Jayson sa amo nga balay apang sang ulihi, ginpahayag niya nga masami man nagakadto ang iya abyan.
Suno kay Almar John, wala siya sang cellphone kag natingala man ini kun paano nahibaluan ni Jayson nga yara siya sa amo nga balay.
