Naeksperyensyahan ang ashfall sa pila ka mga lugar kasunod sang moderately explosive eruption sang Bulkan Kanlaon alas 6:07 kagab-i, Marso 15.
Santo sa report sang Negros Occidental Operations Center, may yara sang napulo ka mga lokal government unit (LGU) nga apektado sang ashfall nga ginabug-usan sang 54 ka mga barangay.
Kabahin sa napulo ka banwa kag ciudad amo ang: Binalbagan, La Castellana, Moises Padilla, Isabela, San Carlos, Himamaylan, Kabankalan, Ilog, Hinigaran kag Pontevedra.
Sa karon, may-ara na sang tatlo ka evacuation centers nga gin-okupar sang 44 ka pamilya ukon 147 ka indibidwal.
Nagdeklarar man ang pila ka mga LGUs sang class suspension sa pampubliko kag pribado nga eskwelahan sa Negros Occidental subong nga adlaw, nga ginalakipan sang Binalbagan, La Castellana, Hinigaran, Himamaylan, Isabela kag Moises Padilla; kasubong man ang ciudad sang Canlaon sa Negros Oriental.
Pahanumdom sang otoridad sa mga pumuluyo nga magsuksok gid sang facemask kag likawan anay ang paggwa sa balay kun indi man lang kinahanglan.
Ginareikomendar man nga magreport sa Barangay Disaster Risk Reduction and Management Council, Local DRRM Offices ukon sa mga lokal nga otoridad kun may mabatyagan nga ashfall ukon iban pa nga emerhensiya.
Sa subong, yara gihapon sa Alert Level 2 ang Bulkan Kanlaon.
