Padayon ang monitoring sang Local Government Unit sang La Castellana matapos ang liwat nga paglupok sang Bulkan Kanlaon kagab-i, Marso 15.
Sa interview sang Bombo Radyo Bacolod kay La Castellana Mayor Añejo Nicor, nagapadayon sila sa pagmonitor sa sitwasyon sang banwa kag nagahulat man sila sang abiso sang National Disaster Risk Reduction Management Office kun kinahanglan nga i-evacuate ang mga residente nga apektado sang ashfall.
Ang mga naapektuhan sang ashfall amo ang Barangay Masulog, Biak na Bato, Cabagnaan, Mansalanao, Camandag, Manghanoy kag Nato.
Gin-abisuhan sang alkalde ang mga residente nga mag-aligmat, magsuksok sang facemask kag likawan ang magwa sa balay.
Wala man sang evacuees sa Barangay Biak na Bato apisar nga may yara sang reported nga ashfall.
Sa interview kay Punong Barangay Joselito Martinez, naglibot sila kag nagpanagtag sang facemask.
Suno kay Martinez, wala pa sang evacuation bangud ginahulat pa nila ang abiso.
Bangud sini, nagpanugyan nalang si Martinez sa mga residente nga magsuksok sang facemask kag liwakan ang pagwa sa balay.
