12 na ang nasapwan nga wala sang kabuhi sa ciudad sang Canlaon samtang may isa nga naligidan sang dako nga bato sa banwa sang Vallehermoso, Negros Oriental bangod sa bagyo Tino.
Nagdangat na sa 291 ka mga pamilya ukon 735 ka mga indibidwal ang gin-evacuate sa ciudad sang Canlaon apang mahimo pa nga magsaka ang numero samtang padayon pa ang assessment.
Ang mga evacuess temporaryo nga nagatinir sa evacuation center sa Brgy Lumapao, Malaiba, Panubigan, Bayog, Mabigo, Budlasan, Masulog, Ninoy Aquino, kag Linothangan.
Samtang, indi anay malabayan ang area sa bahin sang highway Binalbagan bridge kag highway Inyawan bridge kag Mt. Citi Bridge, Sitio Alibabay bridge, Brgy Malaiba kag Brgy Bayog bridge.
Sa interview sang Bombo Radyo Bacolod kay Police Lt. Stephen Polinar, spokesperson sang Negros Oriental Police Provincial Office, 12 ang napatay sa Canlaon City samtang 18 naman ang nareport nga missing.
Suno diri, may isa pa gid nga napatay sa banwa sang Vallehermoso nga naligidan sang dako nga bato.
Nag-eksperyensya sang pagbaha ang lugar matapos mag-awas ang suba kag madamo sang mga dalagko nga bato ang nagligid tubtob sa dalan.
Suno kay Polinar, dako nga problema sa karun amo ang pagkadula sang signal, internet kag kuryente amo nga mabudlay ang pagkuha sang impormasyon.
Padayon sa karun ang ila search and rescue kag retrieval operation sa mga biktima sang bagyo.
Ginapangabay sini nga indi na madugangan pa ang numero sang mga nagkalamatay kag iya ginalauman nga makit-an nga safe ang mga namissing.
