Patay ang siyam ka tuig nga babayi samtang kritikal naman ang kondisyon sang duha ka utod sini nga 14 anyos nga babayi kag apat ka tuig nga lalaki matapos ginlamposan sang bato sa Hacienda Badiang, Barangay E-Lopez, Silay City.
Sa interview sang Bombo Radyo kay Police Lt. Col. Edison Garcia, hepe sang Silay City Police Station, ang amay sang mga bata nagatrabaho bilang inkargado sa Barangay Mansilingan, Bacolod City kag nagapauli lamang kun Sabado para maghatag sang sustento sa mga bata.
Ang amay ang ginkilala nga si Edmon Bornales samtang ang iloy naman nagatrabaho sa luwas sang pungsod.
Suno kay Garcia, wala nakapauli si Bornales sang Biyernes sang gab-i bangod sa makusog nga ulan kag kaina sang udto sang naka-abot ini sa ila balay naabtan sini ang tatlo niya ka bata nga may mga dugo kag ang siyam ka tuig wala na sang kabuhi.
Nakit-an nga ang mga pilas sang mga kabataan lunsay yara sa ila ulo samtang nakit-an ang duha ka dako nga bato sa sulod sang balay nga mahimo gingamit sa paglampos sa mga biktima.
Padayon sa karun nga ginabulong sa ospital ang 14 anyos kag 4 anyos nga bata apang ang manghod ang nahimo na mangayo sang ice candy sa iya amay bangod nga nagutom ini.
Ipaidalom naman sa medico legal ang magulang agud mahibaluan kun bala ini ginhimuslan.
Suno kay Garcia, madamo sang ginalantaw nga motibo sa krimen kaangay na lamang nga pag-ilinaway lamang ini sang mga kabataan ukon bala pagpangawat apang wala man sang may nakita nga nadula nga gamit.
Nagapanawagan sa karun si Garcia sa mahimo may ihibalo sa natabo nga magpalapit sa kapulisan kag nagapanawagan ini mismo sa suspek nga makonsensya sa iya ginhimo agud mahatagan sang hustisya ang mga biktima nga menor de edad.
