Nagpangayo sang bulig ang pamilya sang 14 anyos nga babayi nga ginhimuslan sa norte nga bahin sang probinsya sang Negros Occidental nga mapanas ang video nga naglapta sa natabo nga insidente.
Suno sa pamilya, sang Hunyo ginhagad ang biktima sang iya abyan nga babayi nga magpadulong sa ila nga lugar para magtambong sa ila kapiyestahan.
Nag-upod ang biktima kag didto may kaupod man sila nga kapin sa pito ka mga lalaki.
Apang ang abyan sini ang ginsugat sang iya magulang kag nauna nga nagpauli, samtang ang biktima naman ang nagpabilin.
Sa video, makit-an nga may tatlo ka lalaki kun sa diin ang isa ang nagasampaw sa biktima, ang isa ang nagakuha sang video, kag isa ang nagalantaw.
Nabatian man nga naghambal ang lalaki nga naga-video nga “Dali-a, Kug-a bala”.
Samtang, nakit-an naman ang nawala nga kamot sang biktima nga kaangay nga nagasenyas nga indi ini ma-videohan.
Wala naman nakit-an sa video ang nawong sang biktima apang nakit-an ang nawong sang lalaki nga nagasampaw sa iya, samtang ang duha naman ang may tattoo.
Suno sa pamilya, posible nga may ginpa-inom sa biktima amo nga wala ini sa husto nga paminsaron.
Nagpadulong sa police station ang biktima kag siya ang ginderetso sa Women and Children’s Protection Desk (WCPD) kun sa diin ginpaidalom ini sa medical examination.
Sa bahin sang biktima, luyag lamang sini nga mapanas na kag mauntat ang paglapta sang video apang suno sa kapulisan dapat nga mag-file ini sang complaint para mas ma-ideyahan kag madakpan ang mga suspetsado.
