Katorse ang kabug-usan nga patay kalakip ang duha ka punong barangay kag isa ka lay minister sang simbahan, samtang 12 ang arestado kadungan sang simultaneous police operation sa probinsya sang Negros Oriental kaina sang kaagahon.
Ginapahayag nga nagbato ang mga subjects sa mga pulis nga nagserbe sang search warrant sa duha ka banwa kag isa ka ciudad sa Negros Oriental gani sila ang nagkalamatay.
Sa impormasyon nga nakuha sang Bombo Radyo Bacolod, walo ang patay sa Canlaon City, apat sa Manjuyod kag duha sa Santa Catalina kun sa diin pila ka mga armas ang narekober sang mga pulis.
Nagsugod ang operasyon alas-2:00 sang kaagahon kun sa diin 37 tanan ka search warrant ang ginserbe sang mga pulis angot sa paghupot sang iligal nga mga armas ukon paglapas sa Republic Act 10591 ukon Comprehensive Law on Firearms and Ammunitions.
Ini ang ginpatigayon sang gintingob nga pwersa sang tagsa ka police station, Negros Oriental Police Provincial Office, Police Regional Office 7 kag Criminal Investigation and Detection Group.
Ang nagkalamatay sa Manjuyod amo sanday Punong Barangays Valentin Acabal sang Barangay Kandabong kag Sonny Palagtiw sang Barangay Pansiao.
Patay man sanday Steve Arapoc kag Manulo Martin sang Barangay Pansiao.
Ang mga napatay naman sa Canlaon City amo sanday Edgardo kag Ismael Avelino sang Barangay Panubigan; Rogelio kag Ricky Recomono sang Barangay Masulog; Genesis Palmares sang Barangay Aquino; Gonzalo Rosales sang Barangay Pula; kag Melchor kag Mario Pañares sang Barangay Bayog.
Si Rosales ang lay minister sa ila nga simbahan.
Ang duha nga napatay sa banwa sang Santa Catalina amo sanday Ano Enojo Rapada sang Barangay San Pedro; kag Franklin Lariosa sang Barangay Talabak.
Isa naman ka pulis ang pilason matapos ginapahayag nagbato ang subject sang search warrant nga ginserbe sa banwa sang Santa Catalina.
Napilasan sa batiis kag balikawang si Police Corporal Ian Puerto kag padayon ini nga ginabulong sa isa ka ospital sa Bacolod.
Ang nasambit nga operasyon ang ginpatigayon sa supervision mismo ni Police Regional Office 7 director Brigadier General Debold Sinas.
Suno sa PRO 7 director, miyembro sang Special Partisan Unit sang New People’s Army ang pila ka mga persona nga napatay.
Nakuha man sa ila possession ang sketch sang balay sang mga pulis nga mahimo target sang mga rebelde kag schedule sang ila duty, kalakip na ang short kag long firearms.
Sa interview naman kay Canlaon City Mayor Jimmy Jayme Clerigo, nakabaton man siya sang impormasyon nagikan sa mga pulis nga supporters sang NPA ang iban nga nagkalamatay.
Nagbisita man ang alkalde sa punerarya nga gindal-an sa pila ka mga bangkay agud magpangusisa kag makapalab-ot sang bulig sang city government agud sila ang mapalubong.
