BACOLOD CITY-16 ka mga persona ang arestado sa ginpatigayon nga joint buybust operation ang Philippine Drug Enforcement Agency (PDEA), Philippine National Police Maritime Group kag operatiba sang San Carlos City Police Station sa ciudad sang San Carlos kahapon.
Sa interview sang Bombo Radyo Bacolod kay Police Major Mark Angelo Junco, hepe sang San Carlos City Police Station, ginpahayag sini nga natigayon nila nga madakpan ang 16 tanan ka mga persona sa isa ka drug den sa Purok Tunga, Brgy. 6, San Carlos City, Negros Occidental alas 11:50 kahapon sang udto.
Ginkilala ang mga suspetsado kanday Elmar Bartolin; Carlos Caballero; Marissa Flora; Ryan Canio; Edgie Boy Barbadillo; Laslie Bartolin; Charles Ian Anonas; John Mark Abarquez; Dexter Sibuyan; Cecil Guaycangco; George Casigan; John Jil Recero; Nino Kim Bartolin; Gerry Mangayao; Rolito Ochin kag isa ka menor.
Nakuha sa ila paghinakop ang mga drug paraphernalia kag kapin 20 grams nga suspected shabu nga ginabanta nagabalor sang P240 mil.
Suno kay Junco, nakahunong na sa karun sa custodial facility sang San Carlos City Police Station ang 15 ka mga persona.
Samtang ginturn-over sa Department of Social Welfare and Development (DSWD) San Carlos City ang isa ka menor de edad.
Nakatalana naman nga pasakaan sang kaso ang mga ini sa paglapas sa RA 9165 ukon Comprehensive Dangerous Drugs Act of 2002.
