Ginpangunahan ni Bacolod City Mayor Alfredo “Albee” Benitez ang selebrasyon sang ika-126 nga anibersaryo sang Philippine Independence sa Bacolod City Public Plaza kaina sang aga.
Ang Flag raising ceremony ang gin-umpisahan alas-7:00 kaina sang aga kag ini ang gintambungan sang mga opisyales sang ciudad partikular na ni Congressman Greg Gasataya, Sangguniang Panlungsod members, mga katapo sang kapulisan kag militar, veterans kag boys scout of the Philippines.
Sa mensahe ni Benitez, ang Philippine Independence Day ang espesyal nga adlaw sa pagdumdom sa pagkabaganihan sang atun mga ninuno.
Ini man ang adlaw nga atun mapadayaw nga kita ang Pilipino.
Aminado ang alkalde nga dapat adlaw-adlaw nga ginapadayaw ang pagka-Pilipino, apang sa Independence Day mas dapat nga ipadayaw ang ikasarang sang mga Pinoy.
Ginabalikan man ang mga estorya sang ginhimo nga mga sakripisyo sang atun kanunu-nunuan agud mahatag ang sa karun natun nga kahilwayan.
Pahanumdom ni Benitez nga wala pa natapos ang pagpakigbato, bangod responsibilidad naman sang karun nga henerasyon nga ipadayun ang ila nasuguran.
Dapat nga batuan suno diri ang mga sala nga panan-awan kag sala nga pagginawi nga nagaresulta agud madamo sa gihapon sang tubtob sa karun naga-antos.
Pahanumdom sang alkalde nga balikan ang mga importante nga leksyon nga makuha sa maragtas kag maghugpong para sa kaayuhan sang pungsod.
Samtang sa mensahe naman ni Gasataya, ginadumdom ang paghalad sang kabuhi sang atun kanunu-nunuan agud mapakigbato ang kahilwayan sang Pilipinas.
Gindeklarar sang mga baganihan sa bilog nga pungsod nga ang mga Pilipino ang indi mag-ampo sa mga dumuluong kag indi magpapierde sa mga luyag magtapak sa atun nga hayahay.
Ang masobra 300 ka tuig nga pagsakop sa Pilipinas, ang sobra-sobra na nga leksyon, agud maghugpong ang 7,641 ka mga isla kag magtindog bilang isa ka pungsod.
Panindugan sang kongresista nga dapat magtingob ang tanan sa tinutuyo nga mahatag ang mas masanag nga bwas damlag kag maangkon ang matuod-tuod nga kahilwayan.
