164 sa kabug-usan nga 176 beneficiaries sa Barangay 23, Bacolod City ang natigayon nga makabaton sang 6 mil pesos sa second tranche sang Social Amelioration Program kahapon.
Sa interview sang Bombo Radyo Bacolod kay Punong Barangay Wenceslao Parlan sang Barangay 23, ginpahayag sini nga may yara sang 11 ka mga benepisyaryo sa ila nga barangay nga wala madala bangud nga nakapa-register sila sa National Telecommunications Commission, Social Security System, Department of Labor and Employment (DOLE) kag iban pa nga mga ahensya.
Apang gin-athag ni Parlan nga mahimo sila sa gihapon nga makabaton sang ayuda basta ma-clear lang nila ang ila pangalan sa Department of Social Welfare and Development (DSWD).
Samtang, may isa pa gid ka benepisyaryo nga wala man makakuha bangud nga nagpauli ini sa Mabinay, Negros Oriental.
Suno sa punong barangay, malakip na ini sa leftout beneficiaries.
Nahibaluan nga may yara sang 53 tanan ka mga leftout families ang Barangay 23 nga makabaton sang bilog nga P12 mil paagi sa financial service provider.
Ginkumpirmar man ni Parlan nga nangin matawhay ang tagtaganay sang second tranche sa ila barangay kun sa diin nagasunod gid sila tanan sa proper health protocols agud malikawan nga maglapta ang virus.
