Masobra duha ka kilo nga suspected shabu ang narecover sa isa ka lalaki sa drug buybust operation nga ginpatigayon sa Country Homes Subdivision, Brgy. Estefania, Bacolod City subong nga kaagahon.
Ginkilala ang naaresto kay Jom Flynn Banquillo alias Drake, high value invidual, 37 anyos male, single, wala sang trabaho kag residente sang Country Homes Subdivision, Brgy. Estefania, Bacolod City.
Narecover diri ang 2,500 grams sang suspected shabu nga may standard drug price nga P17,000,000.00.
Sa interview sang Bombo Radyo Bacolod kay Police Col. Joeresty Coronica, City Director, Bacolod City Police Office, ang suspect ang nalakip sa listahan sang Barangay Anti-Drug Abuse Council (BADAC) sa ciudad sang Victorias.
Suno kay Coronica, nagsaylo sa ciudad sang Bacolod kag siya ang ginmonitor sa sulod sang duha ka bulan kun sa diin nangin madinalag-on ang ginpatigayon nga drug buybust operation.
Ginahibalo pa sa karun kun nakaagi na ini priso bangud wala man nagakahulugan nga ang mga nalista sang BADAC ang napriso na.
Ang mga ginalista sa BADAC ang mga indibidwal nga namonitor nga naga-engage sa illegal nga druga.
Gina-alegar nga sa Luzon nagakuha sang supply sang illegal nga druga ang suspek kag ginaimbestigaran pa kun may nabaligya na ini antes pa man nadakpan.
Sa karun nakahunong sa Bacolod Police Station 4 si Banquillo bangud ini ang nadakpan sa area sang nasambit nga police station.
Siya ang mangatubang sang kaso nga paglapas sa Section 5 and 11 sang RA 9165 ukon Comprehensive Dangerous Drugs Act of 2002.
