Wala na ginatugutan ang pagtughong sa mga containers ukon drum sa mga fuel stations.
Sa interview sang Bombo Radyo Bacolod kay Mark, gas station attendant sa Petron-Taculing, tubtob pasado alas-12:00 kaina sang kaagahon ang ila nga pagbaligya antes ang pag-umpisa sang staggered price hike.
Bangod sa kadamuon sang mga naghingagaw sa mas barato nga presyo, nagdangat sa masobra 50 metros ang nagapila nga salakyan sa duha ka magkatuhay nga dereksyon, gani sila ang nag-extend sa pagbaligya.
Dugang pa ni Mark nga nagsarado na ang iban nga mga fuel stations sang gab-i gani nagtingob sa ila ang mga motorista.
Sila ang nakacater naman sang madamo nga motorista bangod may duha sila ka deliveries sang gatong kahapon.
Kalabanan naman sa mga nagpatughong ang nagpa-fulltank.
Suno kay Mark, may ginpanaog na nga memo nga nagadumili sa pagtughong sa mga containers kag drum.
Pahayag sini nga sang tinalikdan, sila ang nagabatun pa apang ginalimit lamang sa 20 litros, apang bangod gindumilian na, sa tangke sang mga salakyan nagid lamang sila mahimo makatughong.
