Ginbuyagyag sang 18 ex-Marines nga nagdul-ong sila sang pila ka mga maleta sa pila ka mga opisyal sang gobyerno kalakip nanday President Ferdinand Marcos Jr., Sen. Vicente Sotto III, Sen. Erwin Tulfo, Mamamayang Liberal party-list Rep. Leila de Lima, anay ACT Teachers Party-list Rep. France Castro kag iban pa.
Base sa joint affidavit sang 18 ka anay suldado, nga nagpakilala bilang mga tinawo ukon bagman ni anay Ako Bicol Party-list Rep. Zaldy Co, nagdeliver sila sang bilyun-bilyon nga piso sang kickbacks naggikan sa mga flood control projects nga nakasulod sa mga maleta, sa diin ang kada maleta ang may unod nga kapin P48 million.
Sa senate hearing sa flood control mess, ginbuyagyag sang isa sa mga ex-marines nga si Johnny Buduan nga sadtong 2022, nagdeliver sila sang lima ka maleta sa Ilocos Norte, nga natalana para kay Presidente Marcos.
Suno diri, may mga maleta man nga gindul-ong sadtong kampanya nga ginbaton ni Rep. Sandro Marcos samtang si Zaldy Co ang nagkuha sang litrato.
Ginpahayag man sang testigo nga gindul-ongan man si Sen. Vicente Sotto sang lima ka dalagko nga maleta sang kwarta sa isa ka building sa Baclaran, Parañaque sang 2024.
Ginkumpirmar man sang testigo nga nagdeliver man ini sang maleta sa balay ni Sen. Erwin Tulfo sang makaduha ka beses.
Lakip man sa listahan sanday former Sen. Antonio Trillanes IV, ang pari nga si Fr. Flavie Villanueva, Rep. Terry Ridon, Rep. Gerville Luistro, Former Rep. Arlene Brosas, Rep. Benny Abante, Rep. Zia Adiong, Rep. Jose Alvarez, Former Rep. Ace Barbers, Rep. Joel Chua, Former Rep. Dan Fernandez, Rep. Janette Garin kag Former Rep. Stella Quimbo.
