BACOLOD CITY-Ginkoronahan ang kandidata sang ciudad sang Talisay bilang Lin-ay sang Negros 2019.
Sa coronation night sa Panaad Park and Stadium sa Brgy. Mansilingan sa ciudad sang Bacolod, nagpangibabaw ang 19-anyos nga si Roxanne Toleco sa 25 ka iban pa nga mga kandidata.
Nangin makahalawat-hawat ang eksena antes ang paglawag sang reyna bangud napuno ang venue sang mga supporters sang mga Lin-ay sang tagsa ka banwa kag ciudad sa Negros Occidental.
Samtang nangin 1st runner up naman si Jarizz Borcelas sang ciudad sang Sagay kag 2nd runner up si Leila Jules Sarino sang banwa sang Hinobaan.
Sa interview kay Toleco, tuman ang pagpasalamat sini matapos nagdaog bilang Lin-ay sang Negros sa sini nga tuig.
Sa karun plano sini nga padayunon ang iya pagtuon apang kun mahatagan sang kahigayunon luyag man sini nga magsulod sa mga international pageants.
Nahibaluan nga manug-2nd year college na sa University of Saint La Salle si Toleco sa kurso nga Psychology.
Samtang nangin “hakot-awards” man si Toleco bangud siya man ang ginkilala nga Miss Photogenic, Best in evening gown kag Organik na Negros 2019.
Nakuha naman sang 1st runner-up ang swimwear special award kag napilian nga People’s Choice.
Nangin Miss Congeniality naman ang Lin-ay sang San Enrique.
