Opisyal na nga ginbuksan ang Terra Madre Asia & Pacific 2025 sa paghost sang probinsya sang Negros Occidental kag ciudad sang Bacolod.
20 ka mga pungsod ang nag-showcase sang ila mga pagkaon para sa event nga magalawig tubtob sa Nobyembre 23.
Ang opening sang Asia Pacific biggest sustainable food gathering sa North Capitol Road ginpangunahan nanday Tourism Secretary Christina Garcia Frasco, Negros Occidental Governor Eugenio Jose ‘Bong’ Lacson, Bacolod City Mayor Greg Gasataya, Bacolod City Lone District Congressman Alfredo ‘Albee’ Benitez samtang yara man sanday Technical Education and Skills Development Authority Director General Jose Francisco “Kiko” Benitez, kag Negros Occidental Third District Repesentative Javier Miguel Benitez.
Ini sa karun ang pinaka-una nga tion nga ginpatigayon ang Terra Madre Asia & Pacific sa Pilipinas.
Suno kay Tourism Secretary Christina Garcia Frasco, ang paghost sang Pilipinas sang Terra Madre Asia & Pacific ang makahatag sang positibo nga impact indi lamang sa ekonomiya apang kasubong man sa livelihood sang komunidad.
Diri mapadayaw, mapakita kag masuportahan ang pagsanyog sang ekonomiya sa bulig sang mga mananagat, mangunguma, cooks, mga restaurant, eateries, producers kag iban pa.
Suno pa kay Frasco, sa pagsuporta sa ila mapakita nga dapat nalakip ang tanan sa tourism ecosystem kag wala sang may mabilin sa tourism development.
Sa karun, yara sa 17 percent ang status sang paggasto sang mga turista nga nagakadto sa mga pagkaon.
Samtang, dako naman ang pagpasalamat ni Negros Occidental Governor Eugenio Jose ‘Bong’ Lacson nga ginhiwat sa probinsya ang Terra Madre Asia & Pacific 2025.
Suno diri, ang pagkaon sa probinsya nagapakita sang kultura kag pagkilala sa mga Negrense.
Suno pa diri, ini na ang tion para sa mga mangunguma kag mananagat nga mapakita ang manggad sang Negros sa pagshowcase sang ila produkto.
Samtang, ginapatigayon naman sa South Capitol Road ang Negros Island Farmers Organic Festival.
