BACOLOD CITY-Nakaangkon sang 2nd degree burn ang duha ka tuig nga bata matapos maulaaan sang bag-ong bak-it nga linuto nga utan sang iya iloy sa lawas sini sa Sitio Dung-i, Barangay Manlocahoc ciudad sang Sipalay nagligad nga Sabado sang udto.
Sa interview sang Bombo Radyo Bacolod kay Sipalay City councilor Dionilo Bogtae, ginpahayag sini nga nakabaton sang tawag ang rescue team sang ciudad tuhoy sa natabo pasado ala-1:30, Sabado sang hapon.
Nahibaluan nga manugpanyaga kuntani ang pamilya sang hinali lang naulaan sang bag-ong bak-it nga linuto nga utan ang duha ka tuig nga bata.
Napaso ini halin sa iya dughan padulong sa iya tiil lakip na sa kamot.
Suno sa konsehal, nadugayan ang ila pagpadulong sa lugar bangud nga nabukid na ini nga bahin sang Sipalay.
Pag-abot sang rescue team, gindapatan nila ini anay sang first aid antes gindala sa infirmary sa ciudad.
