Nagsaka na sa 2,000 ang numero sang mga residente nga nag-evacuate kasunod sang engkwentro sa tunga sang militar kag New People’s Army sa Moises Padilla, Negros Occidental.
Suno sa hepe sang Moises Padilla Municipal Police Station nga si Police Capt. Junjie Liba, nag-hingagaw ang iban nga mga residente nga mag-padulhog sa evacuation center sa Guinpanaan National High School- Magballo Extension covered court bangud sa tuman nga kakulba sa natabo nga pag-engkwetrohanay sang militar kag NPA.
Gikan sa barangay Guinpanaan, Montilla, Inulingan kag Quintin Remo ang nag-hingagaw bakwit antes pa man nagtakop ang kasisidmon.
Kadam-an sa diri ang nag-boluntaryo nga mag-panaog sa ila tagsa ka mga lugar bangud sa ginapahayag nga may presensya pa sang mga makawala nga grupo ang ila barangay.
Samtang, naka-full alert naman sa karun ang mga otoridad kag madamo ang gin-padala nga mga kapulisan gikan sa Negros Occidental Police Provincial Office agud magbulig sa dugang nga pwersa sang mga militar kag mga katapu sang Moises Padilla PNP.
Hugot naman sa karun ang pagbantay sang mga otoridad sa palibot kag gina-dumilian sa gihapon ang mga residente nga magbalik sa lugar tubtob wala pa na clear sang militar nga wala na ang presensya sang makawala nga grupo.
Wala naman ginlipod sang mga residente sa Barangay Quintin Remo, Moises Padilla ang trauma ukon kahadlok sa nasaksihan nga engkwentro sa tunga sang Philippine Army kag New People’s Army.
Sa interview sang Bombo Radyo Bacolod kay Ronald Jilla, 31 anyos, residente sang nasambit nga barangay, naga-panapas sila sang 9 sini nga mga kaupdanan sang hinali na lang nag-paarakay sang tiro ang duha ka grupo sa kampo sang ila ginatapsan.
Ginpahayag man sini naglab-ot pa sa ila ang mga bala, apang maswerte naman nga wala sang may naigo sa ila.
Ginsaysay man sini nga nakit-an nila kun paano gin-lagas sang mga katapu sang NPA ang tropa sang gobyerno.
Samtang, ginsaysay man ni alyas Boyet ang pag-una paarak sang tiro sang NPA sa militar.
Suno sa iya, las-3:00 kahapon sang hapon sang nagbalik siya sa ila puluy-an agud kuntani nga pakanunon ang mga kasapatan sini nga nabilin sa kapareho man nga barangay.
Tuman ka linong ang lugar kun sa diin gina-palibutang sang ginabulubanta 15 ka mga militar sang hinali na lang gin-paarakan sang NPA ang mga tropa sang gobyerno.
Gilayon man nga gin-pahalin sang suldado ang mga pumuluyo sa lugar agud makalikaw sa anu man nga disgrasya.
