BACOLOD CITY-Patay ang duha sa tatlo ka mga suspetsado sang hold-up incident sa Brgy. Cabacungan banwa sang La Castellana kaina sang hapon matapos naluthangan sang mga pulis.
Una diri, las-2:00 kaina sang hapon sang nagdeliver sang feeds ang driver nga si Raul De Loyola, 45-anyos sa balaligyaan nga ginapanag-iyahan nanday Antonio Mabus, PO3 Erwin Bello kag PO1 Rejan Rondubio apang pag-abot sini sa lugar ginpalapitan ini sang mga suspetsado kag nagdeklarar sang hold-up.
Ang mga suspetsado ang ginkilala kanday Garnel Solibaga, 26-anyos sang Nangan, Governor Generoso, Davao Oriental, Edgar Ricaña, 27-anyos sang General Santos kag Jar-R Sta. Ana, 30-anyos sang banwa sang Moises Padilla.
Nakuha sang mga suspetsado kay De Loyola ang P190,188 cash nga dala sini kag nagpalagyo sakay sang ila motorsiklo.
Apang nakapangayo sang bulig ang driver kag gilayon nga nagresponder ang duha ka pulis nga yara man sa lugar kun sa diin gilayon nga nagbayluhanay sang luthang ang mga ini sa mga suspetsado.
Nakapalagyo pa ang mga ini apang natumba sila sa atubangan sang gate sang Cabacungan National High School, mga 150 metros ang kalayuon sa baligyaan sang mga pulis.
Bangud sang mga igo sa lawas gilayon nga napatay sanday Ricaña kag Sta. Ana samtang pilason naman si Solibaga kag ginabulong karun sa Corazon Locsin Montelibano Memorial Regional Hospital.
Wala naman napilasan ang duha ka mga pulis.
Nahibaluan nga sanday PO3 Bello kag PO1 Rondubio ang miembro sang 2nd company sang Negros Occidental Provincial Mobile Force Company (NOCPMFC) nga nabase sa banwa sang Hinigaran.
Magluwas sa iban pa nga mga kagamitan, narekoreber sa crime scene ang cal. 45 pistol kag 357 magnum revolver kag ang cash nga ginkuha sa driver sang delivery ban.
Santo sa imbestigasyon ni PO2 Adrew Trebajo sang La Castellana Municipal Police Station, temporaryo nga nagapuyo sa ciudad sang Canlaon, Negros Oriental ang mga pangayaw nga suspetsado.
Ginahikot naman karun sang La Castellana police ang kaso nga ipasaka batok sa pilason nga si Solibaga.
Suno pa kay PO2 Trebajo, case solved na ang nagluntad nga insidente.
