Ginatinguhaan pa sang probinsya nga mapabalik sa Negros Occidental ang kapin 200 ka mga Overseas Filipino Workers kag mga construction workers nga nastranded sa nagkalain-lain nga parte sang pungsod bangud sa coronavirus disease.
Sa interview sang Bombo Radyo kay Dr. Zeaphard Gerhart Caelian, pinuno sang Provincial Disaster Management Program Division, ginpahayag sini nga may yara sang kabug-usan nga 200 ka mga OFWs kag construction wokers nga nastranded sa Luzon; 84 ka mga seafarers sa Manila; 23 ka mga construction workers sa Cebu; 45 ka mga construction workers sa Iloilo; 24 sa Palawan; kag walo sa Lanao, Mindanao.
Suno kay Caelian, pahanugutan ang mga ini nga magsulod sa probinsya kun may yara sila sang ipakita nga certificate nga natapos na sang mga ini ang home quarantine apang kinahanglan nga magpaidalom gihapon sa 14-day self-isolation pag-abot sa probinsya.
Suno sa iya, pagakabigon ang mga ini nga persons under monitoring (PUMs) kag sa EB Magalona magadiretso para self-isolation.
Nahibaluan nga kahapon nag-abot ang una nga batch sang mga OFWs nagikan sa Cebu kun sa diin 15 ang nagikan sa ciudad sang Bacolod samtang 20 naman ang nagikan sa mga local government units.
