BACOLOD CITY– Wala ginalauman sang Bacoleño nga si Mark John Simondo nga makuha sini ang pinakamataas nga pwesto sa bag-o lang naguwa nga resulta sang 2017 Bar examinations.
Si Simondo nga graduate sang University of Saint La Salle (USLS) Bacolod ang Rank 1 sa bar exams nga nakakuha sang 91.05 percent nga passing rate.
Sa exclusive interview sang Bombo Radyo Bacolod, ginpahayag sini nga wala man siya nagahandom nga magpanguna sa mga passers apang luyag sini nga madala sa Top 10.
Ang 31-anyos nga si Simondo ang tumandok sang Brgy. 33, Baolod City kag bata sang isa ka retired police nga assigned sang una sa Finance Department sang Bacolod City Police Office (BCPO) samtang ang iloy sini ang yara karun sa Amerika kag naga-atipan sang iya lola.
Nahibaluan nga isa man ka registered nurse si Simondo kag sa USLS man ini nag-eskwela.
Tuig 2015 sang nagsugod ini sa Law School.
Suno diri, pagtuon kag pangamuyo lamang ang iya nangin preparasyon sa bar exams.
Magluwas sa iya pamilya, inspirasyon man ini nga iya schoolmate sa Law School.
Suno diri, kun indi bangud sang espesyal nga babaye, duha-duha pa nga nakatapos ini sa pagtuon sang abogasiya.
