Ginpatpat sang Negros Island Region Commission on Election Director ang komplikasyon sa eleksyon inkaso magsaka sa Alert level 4 ukon 5 ang status sang Bulkan Kanlaon.
Sa interview sang Bombo Radyo Bacolod kay Atty Lionel Marco Castillano, sa tion nga magsaka sa Alert Level 5 ang status sang bulkan, ma-extend naman sa 16km radius ang danger zone.
Kun ini ang matabo, bilog nga Canlaon City sa Negros Oriental; banwa sang La Castellana kag Moises Padilla sa Negros Occidental ang magapatigayon sang forced evacuation.
Kasubong man ang katunga sang La Carlota City kag pila ka porsyon sang Bago City.
Suno diri kun dal-on sa iban nga lugar ang evacuees kaangay sa Panaad Park and Stadium, sila ang mahimo makapangita sang pinakamalapit nga eskwelahan nga mahimo magserbe bilang voting centers ukon pagtukod sang makeshift polling tents sa evacuation sites.
Magluwas sa kabudlayan sa pagpatuman sang eleksyon bangod sa kadamuon sang evacuees, mabudlay man sa mga manunudlo nga magaserbe sa eleksyon ilabi na kun sila ang kabahin sa evacuees.
Paathag ni Castillano nga ginatugutan sang layi ang postponement sang eleksyon sa sulod sang 30 ka adlaw kun force majeure ang kabangdanan ukon natural calamity kaangay sang paglupok sang bulkan.
Apang pasalig naman sini nga kun Alert Level 3 lamang, makapatigayon gihapon sang eleksyon sa mga evacuation centers.
Dugang pa sini nga ang mapostpone ang mga apektado lamang nga areas samtang padayun lamang ang eleksyon sa iban nga lugar.
