On standby ang Overseas Filipino Workers help desk sang provincial government sang Negros Occidental para sa mga Negrosanon nga may pamilya nga nagatrabaho sa Middle East.
Sa interview sang Bombo Radyo kay Governor Eugenio Jose ‘Bong’ Lacson, bangod sa modern technology mas mahapos na ang pagkomunikar sa mga pamilya kag abyan nga malayo.
Suno diri, on standby ang help desk sang probinsya nga nagakoordinar sa Department of Migrant Workers kag Overseas Workers Welfare Administration.
Suno sa gobernador, naintindihan sini kun ngaa nagatrabaho sa luwas sang pungsod ang mga Pilipino apang iya lang ginapangabay nga safe lamang sila.
Suno pa diri, iya man ginakasubo ang nagakatabo nga giyera sa tunga sang Estados Unidos, Israel kag Iran nga kun tani mapangitaan sang solusyon agud indi na maapektohan ang ekonomiya sang kalibutan. Samtang, nagtukod sang Overseas Filipino Workers (OFWs) hotline kag help desk ang Local Government Unit sang Bacolod City para ma-assist ang mga Bacolodnon nga may pamilya ukon abyan nga nagatrabaho sa Middle East.
Suno kay Bacolod City Mayor Greg Gasataya, may yara sila sang koordinasyon sa Department of Migrant Workers kag Department of Foreign Affairs para mahibaloan ang mga sitwasyon sang mga OFWs.
Mahimo makacontact sa number nga 0930 877 5097 ukon magpadulong sa Bacolod City Government Center Lobby para magpa-assist.
Suno kay Gasataya, madamo na sang nagreach out sa helpdesk kag santo sa mga report nga ginapadala sa ila, yara sa maayo nga kahimtangan ang mga OFWs.
