BACOLOD CITY — Patay ang isa ka 22-anyos nga dalaga matapos gintiro sang iya amay nga pulis sa Dumaguete City, Negros Oriental, Domingo sang hapon.
Sa impormasyon nga nakuha sang Bombo Radyo Bacolod, ang biktima ginkilala kay April Mae Ege sang Purok Bouguinvilla, Sitio Kanday-ong, Brgy. Kalindagan, Dumaguete City kag bag-o lang nakagradwar sa kurso nga Business Administration.
Suno sa kahagugma sang biktima nga isa man ka babaye, hubog ang suspetsado nga si Police Staff Sergeant Levy Ege, 54-anyos, sang nag-abot sa ila boarding house.
Ginapahayag nga nagbais ang pulis kag ang biktima apang wala pa nahibaluan kun ano ang rason.
Gamit ang .45 caliber pistol, gintiro sang suspetsado ang iya anak sa ulo nga gintunaan sang iya gilayon nga kamatayon.
Gilayon naman nga nadakpan sang mga pulis si Police Staff Sergeant Ege kag priso karon sa Dumaguete City Police Station.
Ang suspetsado ang assigned man sa ciudad sang Dumaguete.
