Patay ang 24 anyos nga lalaki matapos ginbuno sa baylehan sa Sitio Bagtic, Barangay Bulwangan, Hinoba-an, Negros Occidental sang Disyembre 28, 2025.
Ginkilala ang biktima nga si Rex Aguirre, 24 anyos, lalaki, single kag residente sang Sitio Bagtic, Barangay Bulwangan, Hinoba-an samtang ang suspek amo si Jade Lubay, 18 anyos, single kag residente sang Purok 2, Barangay Asia, Hinoba-an.
Sa interview sang Bombo Radyo Bacolod kay Police Major Jaynick Bermudez, hepe sang Hinoba-an Municipal Police Station, natabo ang insidente alas-2:30 sang kaagahon apang ini ang ginreport alas 7:25 na sang aga.
Ini bangud gin-una sang pamilya asikaso ang nabun-an, apang ginbawian man sang kabuhi samtang ginadapatan sang pagbulong sa hospital.
Suno kay Bermudez, ang suspek nga una nga gintudlo sang mga residente amo si Dennis Minlaud, 20 anyos, habal-habal driver kag residente sang Purok 3B, Barangay Bulwangan, Hinoba-an, Negros Occidental.
Suno sa hepe, sa pag-abot sang kapulisan ginturn-over sa ila sanday Minlaud kag Lubay.
Didto na natumod nga indi si Minlaud ang nagbuno sa biktima kundi si Lubay.
Ang suspek ang yara na sa paghinakop sang Hinobaan Municipal Police Station kag magapangatubang sang nagakaigo nga kaso.
