Ginkumpirmar sang pinuno sang Vaccination Center Action Team sang Bacolod City COVID-19 Vaccination (CoVac) Council nga naka-identify na sila sang 25 ka mga vaccination centers para sa patigayunon nga vaccination program kun mangin available na ang bakuna.
Sa interview sang Bombo Radyo Bacolod kay Councilor Renecito Novero, nagsapol ang iya nga team sang Biyernes kag ila naaprubahan ang 25 ka mga centers nga kalabanan mga barangay gymnasiums agud mangin vaccination center.
Ila na ini ginrekomendar kay Mayor Evelio “Bing” Leonardia kag sa Emergency Operations Center (EOC) sa ginpatigayon nga pagsinapol kahapon.
Suno kay Novero, wala ini nagakahulugan nga nga mangin dungan ang patigayunon nga pagbakuna.
Nagapasalamat man si Novero sa willingness sang Negros Occidental Private Schools Sports Cultural Educational Association (NOPSSCEA) nga magpagamit sang gym sang ila mga eskwelahan.
Suno sa konsehal, paga-istoryahon pa niya ang mga opisyal sang pribado nga eskwelahan sa Bacolod angot diri.
Handa naman nga ikonsiderar sang CoVac Council ang offer sang mga private schools.
Samtang, nagpatigayon naman sang dry run sang vaccination kaina sang hapon sa Barangay Villamonte gym.
