Patay ang 27 anyos nga babayi matapos ginlabo sang madamo nga beses sang iya amay sa Purok Kawayanan, Barangay Rafaela Barrera, Sagay City, Negros Occidental, kahapon sang hapon.
Ang amay nga ginkilala nga si Richard Sulan, 51 anyos ang magapangatubang sang kaso nga Parricide, matapos nga ginpatay ang iya 27 anyos nga bata nga ginkilala nga si Roselyn Sulan.
Sa interview sang Bombo Radyo Bacolod kay Police Capt. Hannah Mesheil Banquil, deputy chief of police sa Sagay City Police Station, magkalapit lamang ang balay sang mag-amay ang hinali nga ginsulong sang bata ang iya amay sa puluy-an sini kapin ala-1:00 kahapon sang hapon.
Sa imbestigasyon, ginpahayag sang mga witness nga may nagluntad nga argumento sa duha apang wala na sila nagpasilabot pa bangod ini ang masami man nga nagakatabo.
Suno kay Banquil, may ginsugo ang amay sa iya bata, apang ini ang wala nagtuman kag nangakig, apang wala pa matumod kun ano ang sugo nga gintunaan sang pagbayluhanay sang tinaga.
Pahayag ni Banquil nga bangod sa kaakig sang bata, nagpahayag ini nga patyon niya ang iya amay.
Apang bangod yara sa impluwensya sang makahulubog nga ilimnon, ang amay ang nagkuha sang espading kag ginlabo-labo ang iya nga bata.
Ang biktima ang nakaangkon sang pilas sa nanarisari nga bahin sang lawas kun sa diin nautod ang isa sini ka butkon, nalaplap man ang unod malapit sa iya abaga, kag ini ang may pilas man sa ulo.
Ang amay ang gilayon man nga nagsungka sa Sagay City Police Station.
Suno kay Banquil, ginafinalize na lamang nila ang mga dokumento sa pagpasaka sang kaso sa batok sa suspetsado.
