Arestado ang isa ka 28-anyos nga lalaki matapos makuhaan sang mga drug paraphernalia sa ginapatigayon nga check point sang San Enrique Municipal Police Station sa national highway sang Rizal Street, Barangay Poblacion sa nasambit nga banwa.
Sa interview sang Bombo Radyo kay Police Major Renante Salgado, ginpahayag sini nga nagpatigayon sang ila check point operation sang Miyerkules sang gab-i santo sa direktiba ni Provincial Director Police Col. Romy Palgue nga magpatigayon sang tatlo ka check point operation sa sulod sang isa ka adlaw.
Suno kay Salgado, mga alas 8:00 sang gab-i sang ila ginflag down ang motorsiklo ni Carlo Ruiz, 28 anyos kag residente sang Pescadora Street, Barangay Poblacion bangud wala ini nagasuksok sang helmet kag face mask kag wala sang plate number ang iya motorsiklo.
Ila ini ginparahan kag ginpangitaan sang lisensya kag samtang gina-ukay sini ang iya bag, nagkahulog ang mga unod sini lakip na ang isa ka sachet sang suspected shabu.
Suno sa hepe, ginkapkapan ini kag ginlantaw ang unod sang iya bag kag nakit-an ang duha ka big elongated heat sealed transparent plastic sachet sang suspected shabu; isa ka small elongated heat sealed transparent plastic sachet sang suspected shabu; isa ka big open transparent plastic sachet sang suspected shabu; duha ka small squared heat sealed transparent plastic sachet sang suspected shabu nga nakuha sa iya hawak; kag isa ka blue improvised tooter nga may traces sang shabu.
Ang nakumpiskar nga illegal nga druga ang ginabanta nagabug-at sang 0.4 grams kag may estimated street value nga P2,720.
Suno kay Salgado, newly identified drug personality ang suspetsado kag wala ini sa ila listahan.
Siya ang yara sa karun sa kustodiya sang San Enrique Municipal Police Station kag natalana nga pasakaan sang kaso nga pagbayolar sa R.A. 9165 ukon Comprehensive Dangerous Drugs Act of 2002.
