BACOLOD CITY – Nabalik na tanan ang tatlo ka mga inmates nga nagpalagyo sa detention facility sang Bureau of Jail Management and Penology (BJMP) sa ciudad sang Bacolod, tatlo na ka semana ang nakaligad.
Sadtong Hunyo 4, nag-eskapo sa Metro Bacolod District Jail-Special Intensive Care Area (MBDJ-SICA) sanday Ebson Jaen, Noli Dega kag Marlon Molina matapos ginhingalitan sang mga ini nga indi sila kitaon sa mga jailguards bangud natabunan sang halayan sang linabhan.
Nadakpan gilayon sa amo man nga adlaw si Jaen nga nagapangatubang sang kaso nga may kaangtanan sa iligal nga druga samtang nadakpan naman si Dega sadtong Hunyo 14, apang nadugayan pa ang pagpangita kay Molina nga may kaso nga robbery kag carnapping.
Sang Martes, nagmadinalag-on ang mga BJMP personnel kag Murcia Municipal Police Station sa pagdakop kay Molina sa ila nga balay.
Sa interview sang Bombo Radyo kay Jail Chief Inspector Larry Fuentes, OIC-warden sang MBDJ-SICA, wala naman nagbato si Molina sang ini ang gindakop sa Purok Sunrise, Barangay Blumentritt, Murcia, Negros Occidental.
Sa karun, ginsaylo na ini sa Negros Occidental District Jail sa Bago City.
Nagbutang naman ang MBDJ sang dugang nga watch tower kag combat wire sa mga pader agud labi nga mabantayan ang mga inmates kag indi makapalagyo.
