Tatlo ka mga babayi arestado sa magkatuhay nga drug buybust operation nga ginpatigayon sa ciudad sang Bacolod.
Sa ginpatigayon nga buybust operation sang Bacolod City Drug Enforcement Unit sa Prk. Laurel , Brgy. Mansilingan, Bacolod City sang Biyernes sang hapon, Enero 17, nadakpan sanday Maricar Chavez, 39 anyos, babayi, single, wala sang trabaho kag residente sang Prk. Laurel, Brgy. Mansilingan, Bacolod City; kag Jessa Liza, 36 anyos, babayi, single, wala sang trabaho kag residente sang Prk. Sirisa 2, Brgy. 27, Bacolod City.
Narecover sa mga nadakpan ang isa ka sachet sang suspected shabu bilang buybust item samtang anum ka sachets sang suspected shabu kag duha ka plastic sang suspected shabu.
Nakuha man sang mga ini ang P1000 nga buybust money kag non-drug items.
Ang recoveries ang nagabug-at sang kapin 300 gramos nga may standard drug price nga Php 2,040,000.00.
Ang duha ang nakahunong sa Bacolod Police Station 7 samtang nadakpan man si Lalyn Claro, 50 anyos, babayi, balo, wala sang trabaho kag residente sang Purok Rosal, Brgy. Taculing, Bacolod City.
Siya ang nadakpan kaina sang kaagahon, Enero 18 sa drug buybust operasyon nga ginpatigayon sang Bacolod City Drug Enforcement Unit sa Purok Rosal, Brgy. Taculing, Bacolod City.
Narecover kay Claro ang apat ka heat sealed transparent sachet sang suspected shabu; apat ka knot tied sang suspected shabu, isa ka sachet sang suspected shabu bilang buybust item kag P1000 nga buybust money.
Si Claro ang nakahunong sa Bacolod Police Station 6.
Ang mga nadakpan ang magapangatubang sang kaso nga paglapas sa RA 9165 ukon Comprehensive Dangerous Drugs Act of 2002.
